उत्तर महाराष्ट्रात धरणीकंप!: नाशिकच्या सुरगाण्यात भूकंपाचे 4 धक्के, पालघरही हादरले; घरांना तडे गेल्याने नागरिक दहशतीखाली – Nashik News

उत्तर महाराष्ट्र आणि किनारपट्टीच्या भागात पुन्हा एकदा निसर्गाने नागरिकांची झोप उडवली आहे. नाशिक जिल्ह्यातील सुरगाणा तालुका आणि पालघरचा डहाणू-तलासरी पट्टा शुक्रवारी सकाळी भूकंपाच्या सौम्य धक्क्यांनी हादरला. या घटनेत कोणतीही जीवितहानी झाली नाही. मात्र, वारंवार बसणाऱ्या या हादऱ्यांमुळे स्थानिक नागरिकांमध्ये कमालीची घबराट पसरली आहे. नाशिक: बोरगावात सलग चार हादरे नाशिकच्या सुरगाणा तालुक्यातील बोरगाव आणि लगतच्या परिसरात सकाळी 9:55 वाजेच्या सुमारास भूकंपाचे सत्र सुरू झाले. एकामागोमाग एक असे चार सौम्य धक्के बसल्याने भांबावलेले नागरिक तातडीने घराबाहेर पडून मोकळ्या जागेत जमा झाले. रिश्टर स्केलवर या धक्क्यांची तीव्रता 3.6 इतकी नोंदवण्यात आली आहे. प्रशासकीय आवाहन: “परिस्थिती पूर्णपणे नियंत्रणात असून जिल्हा प्रशासन यावर बारीक लक्ष ठेवून आहे. नागरिकांनी कोणत्याही अफवांवर विश्वास ठेवू नये आणि सतर्क राहावे,” असे आवाहन प्रशासनाकडून करण्यात आले आहे. पालघर: 2018 पासूनचे ग्रहण कायम; अडीच हजारांहून अधिक धक्के दुसरीकडे, पालघर जिल्ह्यातील डहाणू तालुक्यातील कासा आणि धुंदलवाडी परिसरात सकाळी 10:57 वाजेच्या सुमारास 3.1 तीव्रतेचा धक्का जाणवला. पालघरमध्ये 2018 पासून सुरू झालेले भूकंपाचे सत्र थांबण्याचे नाव घेत नाहीये. आतापर्यंत या भागात तब्बल 2,500 पेक्षा जास्त लहान-मोठे धक्के नोंदवले गेले आहेत. कच्च्या घरांना तडे, वचनांची अंमलबजावणी शून्य! वारंवार बसणाऱ्या या हादऱ्यांमुळे जीवितहानी टळली असली, तरी ग्रामीण भागातील आदिवासी बांधवांच्या घरांचे अतोनात नुकसान होत आहे: धोकादायक घरे: डहाणू आणि तलासरी भागातील कच्च्या बांधकामाच्या हजारो घरांच्या भिंतींना तडे गेले असून ती कोसळण्याच्या स्थितीत आहेत. अपूर्ण आश्वासने: तीन वर्षांपूर्वी तत्कालीन सरकारने या भागात भूकंपरोधक घरे (घरकुल) बांधून देण्याचे आश्वासन दिले होते. मात्र, त्याची प्रत्यक्ष अंमलबजावणी अजूनही न झाल्याने नागरिक तीव्र नाराजी व्यक्त करत आहेत. हिंगोली, परभणी, नांदेडची पुनरावृत्ती साधारणतः पंधरा दिवसापूर्वी मराठवाड्यातील काही जिल्ह्यांमध्ये मध्यरात्री भूकंपाचे तीव्र धक्के जाणवले होते. यामुळेही नागरिकांमध्ये प्रचंड भीतीचे वातावरण निर्माण झाले होते. हिंगोली, परभणी आणि नांदेड या तिन्ही जिल्ह्यांमधील अनेक भागांत मध्यरात्री 1 वाजून 37 मिनिटांनी भूकंपाचे हे धक्के जाणवले होते. रिश्टर स्केलवर या भूकंपाची तीव्रता 4.7 इतकी नोंदवण्यात आली आहे. हिंगोलीतील शिरळी परिसरात 4.6 रिश्‍टर स्केलची नोंद झाली आहे. या भूकंपाच्या धक्यांमुळे नागरिकांनी रात्र जागून काढली. वर्षभरापासून मालिका सुरू नांदेड शहरातील तरोडा नाका, मालेगाव, कावरानगर, निळा रोड या भागातील नागरिकांना भूकंपाचे धक्के जाणवले होते. हिंगोली जिल्ह्यात मागील काही वर्षापासून भूकंपाची मालिकाच सुरू आहे. सतत होणाऱ्या भूकंपामुळे नागरीक भयभित झाले आहेत. गुरुवारी ता. 9 जुलै रोजी पहाटे 1 वाजून 37 मिनिटांनी 4.6 रिश्‍टर स्केलचा भूकंप झाला असून शिरली (ता. वसमत) हे भूकंपाचे केंद्रबिंदू असून खोली 10 किलोमीटर आढळले. त्यानंतर दुसरा धक्का 2.15 मिनिटांनी 3.6 रिश्टर स्केल, 2 वाजून 17 मिनिटांनी 3.9 रिश्टर स्केल, तर 3 वाजून 23 मिनिटांनी 4.1 रिश्टर स्केल भूकंपाची नोंद झाली असून त्याचे केंद्रबिंदू काकडदाभा (औंढा नागनाथ) असल्याचे स्पष्ट झाले होते.

Doonited Affiliated: Syndicate News Hunt

This report has been published as part of an auto-generated syndicated wire feed. Except for the headline, the content has not been modified or edited by Doonited.

Source link

https://doonitednews.in/advertisement-rate-card/