महाराष्ट्र शिक्षक पात्रता परीक्षा (TET) पेपरफुटी प्रकरणाच्या तपासाला भिवंडी पोलिसांकडून मोठी गती मिळाली आहे. या प्रकरणात अटक करण्यात आलेल्या तीनही आरोपींना आज न्यायालयात हजर करण्यात आले. सखोल तपासासाठी पोलिसांनी दहा दिवसांच्या कोठडीची मागणी केली होती, मात्र न्यायालयाने आरोपींना 6 जुलैपर्यंत पोलिस कोठडी सुनावली आहे. या संपूर्ण प्रकरणामागे एक मोठे आंतरराज्यीय रॅकेट सक्रिय असल्याचा दाट संशय असून, गुन्ह्यातील आणखी दोन मुख्य आरोपी फरार असल्याची माहिती तपासातून समोर आली आहे. टीईटी पेपरफुटी प्रकरणात पकडण्यात आलेले धीरज बलराज सिंग (वय 28, रा. हरियाणा), राजीव साव (वय 45, रा. बिहार) आणि आकाशकुमार स्वराजकुमार (वय 30, रा. बिहार) या तीन आरोपींना रविवारी भिवंडी जिल्हा व अतिरिक्त सत्र न्यायालयातील न्यायाधीश एस. एम. सुतार यांच्या सुट्टीकालीन न्यायालयात हजर करण्यात आले. तपासादरम्यान या आरोपींकडून टीईटी परीक्षेची प्रश्नपत्रिका जप्त करण्यात आल्याची महत्त्वपूर्ण माहिती पोलिसांनी न्यायालयाला दिली. तसेच, या गुन्ह्यामागील आंतरराज्यीय साखळी उघडकीस आणण्यासाठी व फरार असलेल्या दोन संशयितांना पकडण्यासाठी कोठडीची आवश्यकता असल्याचे पोलिसांनी न्यायालयात स्पष्ट केले. आरोपींना 6 जुलैपर्यंत पोलिस कोठडी हा पेपर नेमका कुठून आणि कसा लीक झाला, महाराष्ट्रात तो आणखी कुठे कुठे विकला गेला आहे का, यातील आर्थिक व्यवहार कशा प्रकारे व कोणासोबत झाले आणि या रॅकेटमध्ये आणखी कोणाचे लागेबांधे आहेत, या सर्व प्रश्नांची उत्तरे शोधण्यासाठी पोलिसांनी न्यायालयाकडे 10 दिवसांच्या कोठडीची मागणी केली होती. प्रकरणाचे गांभीर्य आणि तपासाची व्याप्ती लक्षात घेऊन न्यायालयाने पोलिसांची बाजू ऐकून घेतली व आरोपींना 8 दिवसांची म्हणजेच 6 जुलैपर्यंतची पोलिस कोठडी मंजूर केली. आरोपी धीरज सिंगवर वैद्यकीय उपचार दरम्यान, सुनावणीच्या वेळी आरोपी धीरज सिंग याच्यावर यापूर्वी बॅरिएट्रिक (आतड्याची) शस्त्रक्रिया झाली असल्याने, त्याला नियमित औषधोपचारांची आवश्यकता असल्याचे त्याच्या वकिलांनी न्यायालयाच्या निदर्शनास आणून दिले. यावर, आरोपीला आवश्यक ते सर्व वैद्यकीय उपचार पोलिसांकडून दिले जात असल्याचे स्पष्ट करण्यात आले. दोन्ही बाजूंचा युक्तिवाद ऐकल्यानंतर न्यायालयाने कोठडी सुनावली असून, आता या कालावधीत फरार आरोपींचा शोध, गुन्ह्यातील पैशांचा मार्ग आणि संपूर्ण पेपरफुटी रॅकेटच्या मुळापर्यंत पोहोचण्यावर पोलिसांचे लक्ष केंद्रित झाले आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
