भेसळयुक्त अन्नपदार्थ किंवा बनावट आणि निकृष्ट दर्जाच्या औषधांविरोधात आता नागरिकांना तक्रार नोंदवण्यासाठी मोठी कसरत करावी लागणार नाही. महाराष्ट्र अन्न व औषध प्रशासनाने (FDA) कृत्रिम बुद्धिमत्ता (AI) आधारित नवीन तक्रार नोंदणी प्रणाली सुरू केली असून, मराठी, हिंदी किंवा इंग्रजी भाषेत बोलताच तक्रार आपोआप तयार होणार आहे. या सुविधेची माहिती FDA आयुक्त तुकाराम मुंढे यांनी सोशल मीडियावरील पोस्टद्वारे दिली आहे. फक्त बोला, तक्रार आपोआप तयार होणार अनेकदा भेसळीची माहिती असूनही तक्रार कशी करावी किंवा ती टाईप करण्याचा कंटाळा असल्याने नागरिक पुढे येत नाहीत. मात्र, आता एफडीएने तंत्रज्ञानाचा अत्यंत प्रभावी वापर केला आहे. या नव्या एआय-आधारित प्लॅटफॉर्मवर नागरिकांना केवळ आपली तक्रार तोंडी सांगायची आहे. तुम्ही मराठी, हिंदी किंवा इंग्रजी यापैकी कोणत्याही भाषेत बोललात, तरीही सिस्टीम तुमचे बोलणे ऐकून त्याचे रूपांतर एका स्पष्ट आणि परिपूर्ण अशा लेखी तक्रारीत करेल. यामुळे सर्वसामान्यांना तक्रार करणे अत्यंत सोपे झाले आहे. अन्न आणि औषधांसाठी एकच व्यासपीठ पूर्वी अन्न सुरक्षेबाबत आणि औषध सुरक्षेबाबत तक्रार करण्यासाठी वेगवेगळ्या प्रक्रियांना सामोरे जावे लागत असे. मात्र, आता शासनाने या दोन्ही अत्यंत महत्त्वाच्या गोष्टींसाठी एकच सामायिक व्यासपीठ उपलब्ध करून दिले आहे. दुकानातील निकृष्ट अन्नपदार्थ असो वा मेडिकलमध्ये मिळालेले बनावट औषध, नागरिक एकाच ठिकाणी जाऊन आपला आवाज उठवू शकतात. यामुळे प्रशासनाचा आणि नागरिकांचाही वेळ वाचणार आहे. एका क्लिकवर ट्रॅकिंगची सुविधा तक्रार केल्यानंतर पुढे त्याचे काय झाले, असा प्रश्न अनेकदा नागरिकांना पडतो. या नव्या सुविधेमध्ये अत्यंत पारदर्शकता ठेवण्यात आली आहे. नागरिकांनी https://complaints.mahafda.in या लिंकवर जाऊन आपली तक्रार सबमिट केल्यावर, त्यांना एका क्लिकवर आपल्या तक्रारीची सद्यस्थिती (स्टेटस) ट्रॅक करता येणार आहे. तक्रारीवर प्रशासनाने काय कारवाई केली, याची इत्थंभूत माहिती घरबसल्या मोबाईलवर मिळेल. ‘तुमची जागरूकता म्हणजेच सर्वांची सुरक्षा’ ही अत्यंत महत्त्वाची आणि लोकाभिमुख योजना शेअर करताना तुकाराम मुंढे यांनी नागरिकांना एक खास आवाहन केले आहे. ‘तुमची जागरूकता म्हणजेच सर्वांची सुरक्षा’ असा संदेश त्यांनी दिला आहे. समाजातील अन्न आणि औषधांमधील भेसळ मुळासकट उखडून काढण्यासाठी नागरिकांनी निर्भयपणे पुढे येऊन या नव्या सुविधेचा लाभ घेत आजच तक्रार नोंदवावी, असे आवाहन प्रशासनाकडून करण्यात आले आहे. तुकाराम मुंढेंनी केलेली पोस्ट.. संबंधित बातमी वाचा.. महाराष्ट्रात बंदी असूनही गुटखा मिळतो कसा?:FDA आयुक्त तुकाराम मुंढे यांचा मोठा खुलासा; दूध भेसळखोरांना जन्मठेपेचा इशारा राज्यात गुटखा आणि भेसळयुक्त अन्नाचा सुळसुळाट रोखण्यासाठी अन्न व औषध प्रशासन (FDA) आता पूर्णपणे ॲक्शन मोडमध्ये आले आहे. FDA आयुक्त तुकाराम मुंढे यांनी एका वृत्तवाहिनीला दिलेल्या विशेष मुलाखतीत गुटखा माफियांची नवी कार्यपद्धती आणि राज्यातील दूध भेसळीच्या धक्कादायक वास्तवावर प्रकाश टाकला. “स्वतःचे आयुष्य स्वतः खराब करू नका, विष विकत घेऊ नका,” असे आवाहन करत त्यांनी माफिया आणि भेसळखोरांना कडक इशारा दिला आहे. सविस्तर वाचा..
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
