छत्रपती संभाजीनगर महानगरपालिकेचे स्थायी समिती सभापती अनिल मकरिये यांनी आज शहरातील वाहतुकीस अडथळा ठरणारे विद्युत पोल तातडीने स्थलांतरित (पोल शिफ्टिंग) करण्याचे निर्देश दिले. तसेच, पावसाळ्यापूर्वी शहरातील सर्व नाल्यांची साफसफाई निर्धारित वेळेत पूर्ण करण्याचे आदेशही त्यांनी दिले. या संदर्भात, सभापती मकरिये यांनी महानगरपालिकेच्या विद्युत विभागाचा आढावा घेतला. बैठकीत शहरातील प्रमुख बाजारपेठांमधील पैठण गेट ते गुलामंडी, सतीश मोटर्स ते महात्मा फुले चौक आणि महात्मा फुले चौक ते शाहू महाराज चौक या मार्गांवरील पोल शिफ्टिंगची कामे प्राधान्याने पूर्ण करण्याच्या सूचना देण्यात आल्या. त्यानंतर, नालेसफाईच्या कामांचा आढावा घेण्यासाठी झोन क्रमांक १ ते १० मधील सर्व झोन अभियंत्यांची बैठक घेण्यात आली. शहरातील सर्व नाल्यांची साफसफाई वेळेत पूर्ण करण्याचे निर्देश यावेळी देण्यात आले. सभापती मकरिये यांनी स्पष्ट केले की, नाल्यांमधून काढलेला गाळ रस्त्यावर तसाच पडून न राहता तो तात्काळ उचलावा. याव्यतिरिक्त, नाल्यांवरील अतिक्रमणे हटवून पावसाळ्यापूर्वी पाण्याचा निचरा सुरळीत होईल, यासाठी आवश्यक ती कार्यवाही त्वरित करण्यात यावी, अशा सूचनाही त्यांनी संबंधित अधिकाऱ्यांना दिल्या.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
