बेंगळुरू येथील ‘द आर्ट ऑफ लिविंग इंटरनॅशनल सेंटर’ येथे संस्थेच्या ४५ वर्षांच्या मानवतावादी सेवेच्या पूर्ततेनिमित्त आणि गुरुदेव श्री श्री रविशंकर यांच्या ७० व्या वाढदिवसानिमित्त एका विशेष सोहळ्याचे आयोजन करण्यात आले होते. याप्रसंगी भारताचे उपराष्ट्रपती सी. पी. राधाकृष्णन यांच्या हस्ते युवक विकास, उद्योजकता, शाश्वतता, चेतना अभ्यास आणि शिक्षण या क्षेत्रांशी संबंधित ५ राष्ट्रीय उपक्रमांचा शुभारंभ करण्यात आला. द आर्ट ऑफ लिविंगच्या प्रवासाच्या स्मरणार्थ एका विशेष टपाल तिकिटाचे अनावरणही यावेळी करण्यात आले. या सोहळ्यात ‘युथ करिअर एक्सलन्स प्रोग्राम’, ‘फॅकल्टी ऑफ इस्टर्न नॉलेज सिस्टिम्स’, ‘आर्ट ऑफ लिविंग इनोव्हेशन अँड आंत्रप्रिन्युअरशिप इनक्युबेशन’, ‘सेंटर ऑफ एक्सलन्स ऑन कॉन्शसनेस स्टडीज अँड ह्युमन पोटेंशियल’ आणि ‘इको शांती’ या पाच महत्त्वाकांक्षी उपक्रमांची घोषणा करण्यात आली. हे उपक्रम पर्यावरण, नाविन्यता आणि मानवी विकासावर संस्थेचा वाढता भर दर्शवतात. कार्यक्रमाला संबोधित करताना उपराष्ट्रपतींनी संस्थेच्या १८२ देशांमधील जागतिक कार्याचे कौतुक केले. ते म्हणाले, “अंतर्गत शांतता हाच बाह्य समन्वयाचा पाया आहे, या विचाराने गुरुदेवांनी जगभरात शांतता आणि सौहार्दाचा संदेश पोहोचवला आहे.” कर्नाटकचे राज्यपाल थावरचंद गेहलोत यांनीही गुरुदेवांच्या शांतता प्रस्थापित करण्याच्या प्रयत्नांची प्रशंसा केली. गुरुदेव श्री श्री रविशंकर यांनी मानवी जीवनात ‘ज्ञान, ध्यान आणि संगीत’ या त्रिसूत्रीचे महत्त्व अधोरेखित करत ‘वसुधैव कुटुंबकम्’च्या निर्मितीचे आवाहन केले. आपल्या भेटीदरम्यान उपराष्ट्रपतींनी ‘श्री श्री गुरुकुलम’, ‘प्रताप गणपती मंदिर’, ‘श्री सोमनाथ ज्योतिर्लिंग’ आणि सुमारे १,६०० देशी गायींचे निवासस्थान असलेल्या ‘श्री श्री गोशाळे’ला भेट देऊन पाहणी केली. महिनाभर चाललेल्या या उत्सवाची सांगता या सोहळ्याने झाली. या उत्सवात पंतप्रधान नरेंद्र मोदी, नितीन गडकरी, महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उद्योगपती मुकेश अंबानी, अनंत अंबानी, निरंजन हिरानंदानी आणि चित्रपट सृष्टीतील जॅकी श्रॉफ, राजकुमार हिराणी यांसारख्या देश-विदेशातील ६७८ प्रतिष्ठित मान्यवरांनी हजेरी लावली होती. ‘इंट्युइशन प्रोग्राम’ अंतर्गत मुलांनी सादर केलेले अंतर्ज्ञान क्षमतेचे प्रात्यक्षिक या कार्यक्रमाचे मुख्य आकर्षण ठरले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
