नांदगाव खंडेश्वर येथील कृषी उत्पन्न बाजार समितीच्या उपसभापतीपदी अर्चना कणसे यांची बिनविरोध निवड झाली आहे. बाजार समितीच्या स्थापनेपासून प्रथमच एका महिलेला हे प्रतिष्ठेचे पद भूषवण्याचा मान मिळाला आहे, ज्यामुळे सहकार क्षेत्रात महिलांच्या वाढत्या नेतृत्वाला बळकटी मिळाली आहे. सहकार विभागातील निवडणूक निर्णय अधिकाऱ्यांच्या उपस्थितीत नुकतीच एक विशेष सभा आयोजित करण्यात आली होती. उपसभापतीपदासाठी विहित मुदतीत अर्चना कणसे यांचा एकमेव अर्ज दाखल झाल्याने, निवडणूक निर्णय अधिकाऱ्यांनी त्यांची बिनविरोध निवड झाल्याची घोषणा केली. या निवडीमुळे संपूर्ण तालुक्यात आणि राजकीय वर्तुळात आनंदाचे वातावरण आहे. आजवर पुरुषांचे वर्चस्व असलेल्या कृषी उत्पन्न बाजार समितीच्या नेतृत्वाची धुरा आता एका सक्षम महिला नेत्याच्या हाती आली आहे. अर्चना कणसे यांच्या निवडीमुळे सहकार क्षेत्रात महिलांना मोठे प्रतिनिधित्व आणि सन्मान मिळाल्याची भावना शेतकरी आणि कार्यकर्त्यांमधून व्यक्त होत आहे. निवडीची घोषणा होताच बाजार समितीच्या आवारात कार्यकर्त्यांनी गुलालाची उधळण करत आणि फटाक्यांची आतषबाजी करत जल्लोष केला. यावेळी महाविकास आघाडी, युतीचे प्रमुख नेते, बाजार समितीचे सभापती, सर्व संचालक, विविध संस्थांचे पदाधिकारी आणि मोठ्या संख्येने शेतकरी बांधव उपस्थित होते. उपस्थित मान्यवरांच्या हस्ते नवनिर्वाचित उपसभापती अर्चना कणसे आणि त्यांचे पती संदीप कणसे यांचा जाहीर सत्कार करण्यात आला. आपल्या निवडीनंतर बोलताना अर्चना कणसे म्हणाल्या, “हा केवळ माझा एकटीचा सन्मान नसून संपूर्ण तालुक्यातील शेतकरी, कष्टकरी आणि महिला शक्तीचा विजय आहे. सर्वांना सोबत घेऊन शेतकऱ्यांच्या हिताचे निर्णय घेण्याला माझे पहिले प्राधान्य असेल.” त्यांच्या या ऐतिहासिक निवडीबद्दल संपूर्ण जिल्ह्यातून त्यांचे अभिनंदन केले जात आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
