लातूर जिल्ह्यातील रेणापूर तालुक्यातील खरोळा गावात माणुसकीला काळिमा फासणारी धक्कादायक घटना समोर आली आहे. शेतातील बोअरवेलची इलेक्ट्रिक वायर चोरी केल्याच्या संशयावरून तीन अल्पवयीन मुलांना खांबाला बांधून अमानुषपणे बेदम मारहाण करण्यात आली. या मारहाणीचा व्हिडिओ सोशल मीडियावर व्हायरल झाल्यानंतर संतापाची लाट उसळली असून, संबंधितांवर कठोर कारवाईची मागणी होत आहे. मिळालेल्या माहितीनुसार, खरोळा गावातील एका शेतातील बोअरवेलची इलेक्ट्रिक वायर चोरीला गेल्याची घटना घडली होती. या चोरीचा संशय गावातील तीन अल्पवयीन मुलांवर घेण्यात आला. मात्र, पोलिसांकडे तक्रार करून कायदेशीर मार्ग अवलंबण्याऐवजी काही व्यक्तींनी थेट कायदा हातात घेतला. संशयित ठरवण्यात आलेल्या तिन्ही मुलांना पकडून शेतातील एका खांबाला दोरीने घट्ट बांधण्यात आले. त्यानंतर काठी आणि हाताने त्यांना बेदम मारहाण करण्यात आली. व्हायरल झालेल्या व्हिडिओमध्ये ही मुले वेदनेने ओरडत, गयावया करत असल्याचे दिसून येत आहे. मात्र, मारहाण करणाऱ्यांनी त्यांच्यावर कोणतीही दया न दाखवता मारहाण सुरूच ठेवल्याचे दिसत आहे. या संपूर्ण घटनेचा व्हिडिओ उपस्थित असलेल्या एका व्यक्तीने मोबाईलमध्ये चित्रित केला. तो सोशल मीडियावर व्हायरल होताच नागरिकांनी संताप व्यक्त केला. अल्पवयीन मुलांशी अशा प्रकारची अमानुष वागणूक देणाऱ्यांवर कठोर कारवाई करण्याची मागणी जोर धरू लागली आहे. घटनेची माहिती मिळताच रेणापूर पोलिसांनी तातडीने तपास सुरू केला. पोलिसांनी या प्रकरणात दोन्ही बाजूंनी स्वतंत्र गुन्हे दाखल केले आहेत. मुलांना खांबाला बांधून मारहाण करणाऱ्या संबंधित व्यक्तींविरोधात गुन्हा नोंदवण्यात आला आहे. तर दुसरीकडे, शेतातील बोअरवेलची वायर चोरी झाल्याच्या तक्रारीवरून स्वतंत्र चोरीचाही गुन्हा दाखल करण्यात आला असून, त्या प्रकरणाचाही तपास सुरू आहे. या घटनेमुळे कायदा हातात घेण्याच्या वाढत्या प्रवृत्तीवर पुन्हा एकदा गंभीर प्रश्नचिन्ह उपस्थित झाले आहे. चोरीचा संशय असला तरी कोणालाही शिक्षा करण्याचा अधिकार सामान्य नागरिकांना नसून, अशा प्रकारे अल्पवयीन मुलांना सार्वजनिक ठिकाणी बांधून मारहाण करणे हा गंभीर आणि कायद्याने शिक्षापात्र गुन्हा आहे. व्हायरल व्हिडिओच्या आधारे पोलिसांकडून संबंधितांची ओळख पटवून पुढील कारवाई केली जात असून, या प्रकरणाचा सखोल तपास सुरू आहे. कायदेशीर तरतुदी जर एखादा गुन्हा अल्पवयीन मुलाकडून (१८ वर्षांखालील) घडला असेल किंवा त्यांच्यावर संशय असेल, तर खालील कायदे लागू होतात. 1. कायदा हातात घेणाऱ्यांविरुद्ध कारवाई २. अल्पवयीन मुलांसाठी (विधिसंघर्षग्रस्त बालक) प्रक्रिया
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
