नेरपिंगळाई येथील विविध कार्यकारी सहकारी संस्थेला महाराष्ट्र शासनाचा प्रतिष्ठेचा ‘कृषीरत्न’ पुरस्कार प्रदान करण्यात आला आहे. मुख्यमंत्री देवेंद्र फडणवीस यांच्या हस्ते मुंबई येथे आयोजित एका कार्यक्रमात संस्थेचे अध्यक्ष संजय सुने यांनी हा पुरस्कार स्वीकारला. कृषी, सहकार आणि शेतकरी विकासासाठी केलेल्या उल्लेखनीय कार्याबद्दल संस्थेला हा बहुमान मिळाला आहे. मुंबई येथे पार पडलेल्या राज्यस्तरीय सत्कार सोहळ्यात विविध क्षेत्रांत उत्कृष्ट कार्य करणाऱ्या संस्था आणि व्यक्तींना सन्मानित करण्यात आले. या सोहळ्यात मुख्यमंत्री फडणवीस यांच्या हस्ते संजय सुने यांनी पुरस्कार स्वीकारला. हा क्षण नेरपिंगळाई विविध कार्यकारी सहकारी संस्थेच्या इतिहासातील एक महत्त्वाचा टप्पा मानला जात आहे. पुरस्कार स्वीकारल्यानंतर अध्यक्ष संजय सुने यांनी हा सन्मान संस्थेच्या सर्व सभासद, संचालक मंडळ, अधिकारी-कर्मचारी आणि परिसरातील शेतकरी बांधवांना समर्पित असल्याचे सांगितले. सभासदांचा विश्वास, संचालक मंडळाचे दूरदृष्टीपूर्ण नेतृत्व आणि कर्मचाऱ्यांच्या प्रामाणिक परिश्रमामुळेच हा बहुमान प्राप्त झाल्याचे त्यांनी नमूद केले. भविष्यातही शेतकरी हिताच्या अधिक प्रभावी योजना राबवून संस्थेचे कार्य अधिक उंचीवर नेण्याचा निर्धार त्यांनी व्यक्त केला. या पुरस्कारामुळे नेरपिंगळाई परिसरात आनंदाचे वातावरण निर्माण झाले आहे. विविध सामाजिक, राजकीय, शैक्षणिक आणि सहकारी क्षेत्रातील मान्यवरांनी अध्यक्ष संजय सुने, संचालक मंडळ, अधिकारी, कर्मचारी आणि सर्व सभासदांचे अभिनंदन केले आहे. राज्य शासनाने केलेला हा सन्मान ग्रामीण भागातील सहकार चळवळ अधिक सक्षम करण्यासाठी प्रेरणादायी ठरेल, अशी भावना व्यक्त होत आहे. नेरपिंगळाई विविध कार्यकारी सहकारी संस्था गेल्या अनेक वर्षांपासून शेतकरी हिताला सर्वोच्च प्राधान्य देत कार्यरत आहे. पीककर्जाचे वेळेवर वितरण, कृषी निविष्ठांचा पुरवठा, सभासदांना पारदर्शक सेवा, शासनाच्या विविध कृषी योजनांची प्रभावी अंमलबजावणी तसेच ग्रामीण भागातील सहकार चळवळीला बळकटी देण्यासाठी संस्थेने सातत्याने उल्लेखनीय कार्य केले आहे. संस्थेच्या याच उत्कृष्ट कार्याची दखल घेत राज्य शासनाने ‘कृषीरत्न’ पुरस्काराने गौरव केला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
