पुणे जिल्ह्यातील भोर तालुक्यातील नसरापूर येथून एक अत्यंत धक्कादायक आणि संतापजनक घटना समोर आली आहे. एका निष्पाप चिमुकलीवर नराधमाने आधी अत्याचार केला आणि त्यानंतर तिची दगडाने ठेचून निर्घृण हत्या केल्याचे उघड झाले असून, या पाशवी कृत्यामुळे संपूर्ण पुणे जिल्ह्यात संतापाची लाट उसळली आहे. नसरापूर गावात माणुसकीला काळिमा फासणारी एक संतापजनक घटना समोर आली आहे. एका 65 वर्षीय नराधमाने घरासमोर खेळणाऱ्या अवघ्या 4 वर्षीय चिमुकलीला गोठ्यात नेऊन तिच्यावर बलात्कार केला आणि त्यानंतर दगडाने ठेचून तिची निर्घृण हत्या केली. इतकेच नव्हे, तर आरोपीने पुरावा नष्ट करण्याच्या उद्देशाने तिचा मृतदेह शेणाच्या ढिगाऱ्याखाली लपवून ठेवला होता. या अमानवीय कृत्यामुळे संपूर्ण गावात संतापाची लाट उसळली असून सध्या तिथे कमालीचे तणावाचे वातावरण निर्माण झाले आहे. दुपारी खेळता खेळता चिमुकली बेपत्ता झाल्यानंतर कुटुंबीयांनी केलेल्या शोधाशोधीत तिचा मृतदेह गोठ्यात आढळून आला. यानंतर परिसरातील सीसीटीव्ही फुटेज तपासले असता संबंधित नराधम तिला गोठ्याकडे नेताना स्पष्टपणे दिसल्याने हा घृणास्पद प्रकार उघडकीस आला. सुट्टीनिमित्त आपल्या आजीकडे आलेल्या या चिमुकलीचा असा करुण अंत झाल्याने परिसरात प्रचंड संतापाची लाट असून, पोलिसांनी संशयित आरोपीला तातडीने ताब्यात घेऊन त्याची कसून चौकशी सुरू केली आहे. या हृदयद्रावक घटनेनंतर नसरापूरचे ग्रामस्थ अत्यंत आक्रमक झाले असून, जोपर्यंत नराधम आरोपीला त्यांच्या ताब्यात दिले जात नाही, तोपर्यंत चिमुकलीचा मृतदेह हलवू देणार नाही, अशी ठाम भूमिका त्यांनी घेतली आहे. संतप्त गावकऱ्यांनी सध्या गोठ्याबाहेरच ठिय्या मांडला असून, पोलिस प्रशासनाकडून चर्चेचे आणि समजावण्याचे प्रयत्न सुरू असले तरी ग्रामस्थ ऐकण्याच्या मनस्थितीत नसल्याने घटनास्थळी मोठा तणाव आणि गोंधळाचे वातावरण निर्माण झाले आहे. दरम्यान, घटनास्थळी पोहोचलेल्या नातेवाईकांनीही आपला तीव्र संताप व्यक्त करत आरोपीला कठोरातील कठोर शिक्षा देण्याची मागणी केली आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
