ज्येष्ठ शास्त्रीय गायक आणि संगीतकार पं. डॉ. विकास कशाळकर यांच्या अमृतमहोत्सवानिमित्त आयोजित सत्कार सोहळ्यात ज्येष्ठ संगीत रंगभूमी कलावंत सुरेश साखवळकर यांनी त्यांचे कौतुक केले. शास्त्रीय संगीतातील विद्वानांनी संगीत रंगभूमीला दिलेले योगदान मोलाचे असल्याचे साखवळकर म्हणाले. साखवळकर यांनी नमूद केले की, शास्त्रीय संगीतातील विद्वानाने संगीत नाटक लिहिणे, त्याला संगीत देणे आणि ते रंगभूमीवर आणणे हा एक अपूर्व योग आहे. भास्करबुवा बखले, गोविंदराव टेंबे आणि मास्टर कृष्णराव यांसारख्या उत्तम गायकांनीही संगीत नाटकांना उत्कृष्ट संगीत दिले. ही परंपरा डॉ. विकास कशाळकर यांनी ‘ऊस डोंगा परी’ हे नाटक लिहून पुढे नेली आहे, असे ते म्हणाले. श्रुती संगीत निकेतन, अहिल्यानगरतर्फे पं. डॉ. विकास कशाळकर यांच्या अमृतमहोत्सवानिमित्त हा सत्कार सोहळा भरत नाट्य संशोधन मंदिरात आयोजित करण्यात आला होता. यावेळी राज्यसभा खासदार डॉ. मेधा कुलकर्णी, ज्येष्ठ सनदी लेखापाल विजयकांत कुलकर्णी, राजश्री विकास कशाळकर आणि ज्येष्ठ तबलावादक तथा भरत नाट्य संशोधन मंदिराचे अध्यक्ष पांडुरंग मुखडे उपस्थित होते. संगीत नाटकांना मराठी संस्कृतीची जुनी आणि समृद्ध परंपरा आहे. नवीन संगीत नाटके रंगभूमीवर यावीत अशी सर्वांचीच अपेक्षा आहे. डॉ. कशाळकर यांनी लिहिलेले आणि संगीतबद्ध केलेले संत चोखामेळा यांच्यावरील ‘ऊस डोंगा परी’ हे संगीत नाटक रंगभूमीवर आले आहे, ही महत्त्वाची बाब आहे. चांगल्या कलाकृती रंगमंचावर आल्यास चांगले रसिक घडतात, असेही साखवळकर यांनी सांगितले. आषाढी एकादशीच्या पार्श्वभूमीवर सादर होणाऱ्या या नाटकाला रसिकांनी प्रतिसाद दिल्यास संगीत रंगभूमीला चांगला बहर येईल, अशी आशा त्यांनी व्यक्त केली. ज्येष्ठ सनदी लेखापाल विजयकांत कुलकर्णी यांनी यावेळी बोलताना सांगितले की, संतांनी सांगितलेले तत्त्वज्ञान पुढील पिढीपर्यंत पोहोचवण्यासाठी नाटक हे एक प्रभावी माध्यम आहे. ‘ऊस डोंगा परी’ या नाटकातून भक्ती, शक्ती आणि माणुसकीचे उत्तम दर्शन घडते. सध्याच्या परिस्थितीत तरुण पिढीवर संस्कार होण्याच्या दृष्टीने संतांच्या जीवनावर आधारित नवनवीन संगीत नाटके रंगभूमीवर येणे ही काळाची गरज आहे, असे कुलकर्णी यांनी अधोरेखित केले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
