छत्रपती संभाजीनगर शहरातील सिडको परिसरातील फर्स्टक्राय इंटेलिटोट्स प्री-स्कूलमध्ये २२ जून रोजी शाळेतील मदतनिसाने लहान मुलांना एका खोलीत बाहेरून कडी लावून कोंडून ठेवल्यानंतर एका अडीच वर्षांच्या मुलाने २३ महिन्यांच्या चिमुकल्याला तब्बल १५ मिनिटे बेदम मारहाण करत त्याच्या अंगावर २५ ठिकाणी चावे घेतले. शाळा प्रशासनाने हे प्रकरण दडपण्याचा प्रयत्न केला. याप्रकरणी एमआयडीसी सिडको पोलिस ठाण्यात मुख्याध्यापिकेसह व्यवस्थापनावर गुन्हा दाखल करण्यात आला आहे. याप्रकरणी २३ जून रोजी पोलिसांनी मुख्याध्यापिका कांचन येवले, सीईओ शुभम महेश्वरी (पुणे), मालक विजय रेड्डी (हैदराबाद), रिजनल मॅनेजर मंगेश मुसळे, महाराष्ट्र हेड अनुराधा सिंग आणि मदतनिसाविरुद्ध बीएनएस कलम १२५(अ), १२५(ब), ३१८(३), ३५१(२) व बाल न्याय कायदा कलम ७५ नुसार गुन्हा दाखल केला आहे. प्री-प्रायमरीसाठी असे आहेत सुरक्षानियम प्री-प्रायमरी वर्गांसाठी सरकारचे नियम आहेत. या शाळेत बाहेरील व्यक्तींना प्रवेश नसतो. वर्गखोल्या हवेशीर, सुरक्षित आणि मुलांसाठी अनुकूल असाव्यात. प्राथमिक उपचारांची सुविधा असावी. विद्यार्थ्यांना एकटे सोडू नये. शाळेत प्रथमोपचार पेटी आणि प्रशिक्षित कर्मचारी असणे अनिवार्य आहे. तक्रार मिळतात डे केअर सेंटर बंद करण्याचे आदेश तक्रार मिळताच पाहणी करण्यात आली. तपासणीनंतर एफआयआर दाखल करण्यात आला आहे. ते ‘डे केअर सेंटर’ आहे. सुरक्षेची काळजी सर्वांनीच घेणे आवश्यक आहे. हे ‘डे केअर’ बंद करण्याचे आदेश दिले आहेत. त्यांनी नोंदणी केलेले प्रमाणपत्रही दिले नाही. – जयश्री चव्हाण, प्राथमिक शिक्षणाधिकारी शाळेचा निष्काळजीपणा, पालकांना धमकीही देवळाई चौक परिसरातील वकील फिर्यादीनुसार, व्यवस्थापनाने अडीच तास माहिती लपवली. फुटेज कट करून दिले. “आम्ही पैसे देतो, तक्रार करू नका, कुणी काही बिघडवू शकत नाही,’ अशी धमकी दिली. सीसीटीव्हीत वास्तव उघड सीसीटीव्ही फुटेजनुसार सकाळी ११ ते ११:३० च्या सुमारास एका मदतनीस महिलेने ३ मुलांना खोलीत कोंडले. नंतर एका अडीच वर्षांच्या मुलाने फिर्यादीच्या मुलाला मारहाण करत २५ ठिकाणी चावे घेतले. दुसऱ्या लहान मुलीलाही मारले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
