महाराष्ट्रात आज झालेल्या दोन वेगवेगळ्या भीषण रस्ते अपघातांत एकूण चार जणांचा दुर्दैवी मृत्यू झाला असून, जळगाव जिल्ह्यातील जामनेर येथे झालेल्या अपघातात पती-पत्नीचा जागीच अंत झाला, तर सुदैवाने त्यांची एक वर्षाची चिमुकली यातून बचावली आहे. दुसरीकडे, सोलापूर जिल्ह्यातील अक्कलकोट-गाणगापूर महामार्गावर बस आणि डंपरची समोरासमोर जोरदार धडक होऊन झालेल्या अपघातात अन्य दोघांचा मृत्यू झाला असून, या दोन्ही घटनांमुळे राज्यभरात हळहळ व्यक्त केली जात आहे. जळगाव जिल्ह्यातील जामनेर महामार्गावर तोरणाळा येथील स्मशानभूमीजवळ एक काळजाचा थरकाप उडवणारा अपघात घडला. सातबारा येथील रहिवासी असलेले गोपाल वासुदेव खडके (वय 50) आणि त्यांची पत्नी सोनाली गोपाल खडके (वय 45) हे आपल्या दुचाकीवरून घरी परतत असताना हा अपघात झाला. प्रवासादरम्यान दुचाकीवरील नियंत्रण सुटल्याने त्यांच्या वाहनाने समोर चालणाऱ्या ट्रॅक्टरला मागून अत्यंत भीषण धडक दिली. ही धडक इतकी जोरदार होती की, या पती-पत्नीचा जागीच दुर्दैवी मृत्यू झाला. एक वर्षाची चिमुकली थोडक्यात बचावली या अत्यंत भीषण घटनेत एक सुखद धक्का देणारी बाब म्हणजे, या दाम्पत्यासोबत असलेली त्यांची एक वर्षाची चिमुकली मुलगी या अपघातातून सुदैवाने सुरक्षित बचावली आहे. घटनेची माहिती मिळताच स्थानिक ग्रामस्थांनी मदतीसाठी घटनास्थळी धाव घेतली आणि पोलिसांना पाचारण केले. पोलिसांनी तत्काळ घटनास्थळाचा पंचनामा करून मृतदेह शवविच्छेदनासाठी पाठवले आहेत. एका क्षणात आई-वडिलांचे छत्र हरवल्याने चिमुकल्या मुलीवर आणि खडके कुटुंबावर दुःखाचा डोंगर कोसळला असून संपूर्ण परिसरात मोठी हळहळ व्यक्त केली जात आहे. एसटी बस आणि डंपरचा भीषण अपघात अक्कलकोट-गाणगापूर महामार्गावर अक्कलकोट तालुक्यातील रुद्देवाडी गावाजवळ एसटी बस आणि मुरुमाने भरलेल्या डंपरमध्ये झालेल्या भीषण धडकेत दोघांचा जागीच मृत्यू झाला आहे. अक्कलकोटहून गाणगापूरकडे जाणाऱ्या बसला समोरून येणाऱ्या डंपरने इतकी जोरदार धडक दिली की, या भीषण आघातानंतर डंपरने जागीच पेट घेतला. या दुर्दैवी घटनेत अक्कलकोट तालुक्यातील 18 वर्षीय तरुणी चंद्रभागा लाडप्पा हडपद आणि धाराशिव जिल्ह्यातील 76 वर्षीय वृद्ध चांगदेव श्रीरंग लवटे यांचा अंत झाला आहे. या अपघातात एसटी बसच्या समोरच्या भागाचे मोठ्या प्रमाणावर नुकसान झाले असून बसमधील काही प्रवासी गंभीर जखमी झाले आहेत, तर काही प्रवाशांना किरकोळ दुखापत झाली आहे. अपघाताची माहिती मिळताच स्थानिक नागरिकांनी मदतीसाठी धाव घेतली आणि जखमींना तातडीने उपचारासाठी रुग्णालयात हलवले. दरम्यान, मृत प्रवाशांचे मृतदेह शवविच्छेदनासाठी शासकीय रुग्णालयात पाठवण्यात आले असून, या भीषण अपघातामुळे परिसरात मोठी हळहळ व्यक्त करण्यात येत आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
