अमरावतीचे जिल्हाधिकारी आशिष येरेकर यांनी नुकतीच राष्ट्रसंत तुकडोजी महाराज यांच्या गुरुकुंज आश्रमाला भेट दिली. या भेटीदरम्यान त्यांनी राष्ट्रसंतांच्या महासमाधीचे दर्शन घेतले आणि सामुदायिक प्रार्थनेत सहभाग घेतला. आश्रम परिसर आणि आध्यात्मिक वातावरण पाहून ते मंत्रमुग्ध झाले. जिल्हाधिकारी येरेकर यांचा मोझरी ग्राम येथे ‘गावमुक्काम’ कार्यक्रम आयोजित करण्यात आला होता. या नियोजित दौऱ्यानिमित्त त्यांनी सायंकाळी गुरुकुंज आश्रमास भेट दिली. सर्वप्रथम, जिल्हाधिकारी आशिष येरेकर यांनी राष्ट्रसंतांच्या महासमाधीचे दर्शन घेतले. त्यानंतर ते सामुदायिक प्रार्थनेला उपस्थित राहिले. आश्रमातील आध्यात्मिक वातावरण आणि परिसराची माहिती जाणून घेतल्यानंतर ते अक्षरशः भारावून गेले. या भेटीदरम्यान, त्यांनी अखिल भारतीय श्रीगुरुदेव सेवा मंडळाच्या मध्यवर्ती कार्यालयालाही भेट दिली. तेथे त्यांनी पद्मश्री पुरस्कारप्राप्त जनार्दनपंत बोथे गुरुजी यांचे अभिनंदन करून त्यांना शुभेच्छा दिल्या. याप्रसंगी जिल्हाधिकारी येरेकर यांच्यासह उपस्थित उपविभागीय अधिकारी दादासाहेब दराडे आणि तहसीलदार मयुर कळसे यांनी बोथे गुरुजींचा शाल व पुष्पगुच्छ देऊन सत्कार केला. बोथे गुरुजींनी जिल्हाधिकाऱ्यांना राष्ट्रसंतांच्या सहवासातील महत्त्वाचे प्रसंग, महाराजांचे स्वातंत्र्य चळवळीतील योगदान आणि त्यांच्या विविध कार्यांची माहिती दिली. या अनुभवानंतर जिल्हाधिकारी आशिष येरेकर यांनी आपली प्रतिक्रिया व्यक्त केली. ते म्हणाले, “आश्रम परिसर पाहून आणि सामुदायिक प्रार्थनेतील आध्यात्मिक वातावरणाचा अनुभव घेऊन मी मंत्रमुग्ध झालो आहे. अशी मन:शांती आणखी कोठे मिळणे अशक्य आहे.”
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
