मोर्शी येथील उपजिल्हा रुग्णालय आणि वरुड ग्रामीण रुग्णालयाचे वैद्यकीय अधीक्षक डॉ. प्रमोद पोतदार यांचा खासदार सुप्रिया सुळे यांच्या हस्ते सत्कार करण्यात आला. शस्त्रक्रिया आणि रक्तदानाच्या क्षेत्रात केलेल्या अतुलनीय कामगिरीबद्दल तसेच दोन्ही रुग्णालयांच्या कायापालटासाठी त्यांना गौरविण्यात आले. हा सत्कार श्री. शिवाजी शिक्षण संस्थेचे अध्यक्ष तथा माजी कृषिमंत्री हर्षवर्धन देशमुख यांच्या ७५ व्या अमृत महोत्सवी वर्षाच्या निमित्ताने आयोजित विशेष कार्यक्रमात करण्यात आला. यावेळी खासदार अमर काळे, खासदार बळवंतराव वानखडे, माजी गृहमंत्री अनिल देशमुख, विदर्भ साहित्य संघाचे अध्यक्ष डॉ. गिरीश गांधी, मोर्शीच्या नगराध्यक्षा प्रतीक्षाताई गुल्हाने, उपाध्यक्ष डॉ. प्रदीप कुऱ्हाडे, डॉ. प्रवीण चौधरी आदी मान्यवर उपस्थित होते. खासदार सुप्रिया सुळे यांनी डॉ. पोतदार यांना दोन चषक, शाल, श्रीफळ आणि पुष्पगुच्छ देऊन सन्मानित केले. डॉ. पोतदार यांच्या कार्यकाळात मोर्शीच्या उपजिल्हा रुग्णालयाने अनेक महत्त्वपूर्ण पुरस्कार पटकावले आहेत. यामध्ये राज्यस्तरीय एकत्रित महात्मा फुले जनआरोग्य योजना आणि प्रधानमंत्री जन आरोग्य योजनेअंतर्गत जिल्हाधिकारी यांच्या हस्ते मिळालेला पुरस्कार तसेच राष्ट्रीय कायाकल्प योजनेद्वारे राज्यातून प्राप्त झालेला दहा लाखांचा द्वितीय पुरस्कार यांचा समावेश आहे. त्याचप्रमाणे, वरुड येथील ग्रामीण रुग्णालयालाही अनेक पुरस्कारांनी सन्मानित करण्यात आले आहे. यामध्ये वंदनीय बाळासाहेब ठाकरे आरोग्य रत्न पुरस्कार, डॉ. आनंदीबाई गौरव पुरस्कार आणि राष्ट्रीय बाल स्वास्थ कार्यक्रमात जिल्हास्तरीय प्रथम पुरस्कार यांचा समावेश आहे. डॉ. प्रमोद पोतदार यांनी तीन वर्षांच्या कार्यकाळात मोर्शी आणि वरुड येथे महिलांच्या मोफत गर्भपिशवी शस्त्रक्रिया, सामान्य शस्त्रक्रिया, सिझेरियन शस्त्रक्रिया आणि अनेक लघु शस्त्रक्रिया यशस्वीपणे पार पाडल्या. त्यांनी पल्स पोलिओ मोहीमही उत्कृष्टरित्या राबवली. विशेष म्हणजे, डॉ. पोतदार यांनी मोर्शी व वरुड येथे रक्तदाता संघाची स्थापना करून हजारो बॉटल रक्त संकलित करण्याचा विक्रमही केला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
