मुंबईत प्रवाशांच्या सेवेसाठी अविरतपणे धावणाऱ्या बेस्टचे आजी-माजी कर्मचारी आता एक मोठा निर्णय घेण्याच्या तयारीत असून, प्राप्त माहितीनुसार ते येत्या 18 जूननंतर बेमुदत संपावर जाण्याच्या पावित्र्यात आहेत. बेस्टची वाहतूक व्यवस्था सुरळीत राहावी यासाठी रोज हजारो कर्मचारी अथक परिश्रम घेत असतात. मात्र आता याच कर्मचाऱ्यांनी संपाचे हत्यार उपसल्यामुळे मुंबईतील लाखो चाकरमान्यांची आणि दैनंदिन प्रवाशांची मोठी गैरसोय होण्याची दाट शक्यता निर्माण झाली आहे. बेस्टच्या माजी आणि सेवानिवृत्त कर्मचाऱ्यांचे थकीत पैसे अद्याप देण्यात न आल्याने कामगारांमध्ये सध्या तीव्र नाराजी पसरली असून, आपल्या प्रलंबित मागण्या मान्य करून घेण्यासाठी तब्बल 12 कामगार संघटनांनी एकत्र येत एका कृती समितीची स्थापना केली आहे. या आंदोलनाची पुढील दिशा ठरवण्यासाठी 8 जून रोजी कामगारांचा एक विशेष मेळावा आयोजित करण्यात आला असून, प्रशासनाने 18 जूनपर्यंत या मागण्यांवर कोणताही ठोस निर्णय न घेतल्यास त्यानंतर थेट बेमुदत संपावर जाण्याचा सज्जड इशारा कृती समितीने दिला आहे. कामगारांच्या या अल्टिमेटममुळे बेस्ट प्रशासनावर मोठा दबाव निर्माण झाला असून, आता आगामी काळात प्रशासन काय भूमिका घेणार आणि या संभाव्य संपामुळे मुंबईकरांवर काय परिणाम होणार, याकडे सर्वांचे लक्ष लागून राहिले आहे. RTO कर्मचारीही जाणार संपावर? वरिष्ठ अधिकाऱ्यांची हेकेखोर भूमिका आणि प्रलंबित मागण्यांकडे प्रशासनाकडून होत असलेले सातत्यपूर्ण दुर्लक्ष यामुळे आरटीओ कर्मचारी सध्या चांगलेच आक्रमक झाले आहेत. या प्रश्नावर तोडगा काढण्यासाठी आरटीओ संघटनेच्या पदाधिकाऱ्यांनी परिवहनमंत्री प्रताप सरनाईक यांच्यासोबत नुकतीच एक महत्त्वपूर्ण बैठक घेतली. मात्र यातून कोणताही ठोस दिलासा न मिळाल्यामुळे आता कर्मचारी संघटनांनी संपाचे हत्यार उपसण्याचा मोठा निर्णय घेतला आहे. प्रशासनाचे लक्ष वेधण्यासाठी सर्व आरटीओ कर्मचारी येत्या 9 जून रोजी एक दिवसीय संपावर जाणार असून, त्यानंतरही मागण्या मान्य न झाल्यास 16 जूनपासून थेट बेमुदत संपावर जाण्याचा सज्जड इशारा या कर्मचाऱ्यांनी दिला आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
