सध्याच्या आधुनिक युगात लहान मुलांवर योग्य संस्कार व्हावेत आणि त्यांना आपल्या समृद्ध संस्कृतीची ओळख व्हावी, या उद्देशाने सनातन संस्थेच्या वतीने केशवनगर भागातील जानोरकर मंगल कार्यालय, डाबकी रोडवरील राजेश्वर कॉन्व्हेंट येथे आयोजित करण्यात आलेल्या पाच दिवसीय सनातन संस्कार प्रशिक्षण शिबिराचा समारोप झाला. या दोन्ही शिबिरांमध्ये बाल साधकांचा प्रतिसाद लाभला. दररोज सकाळी ९ ते १२ या वेळेत झालेल्या या शिबिरांमध्ये लहान मुलांच्या शारीरिक, मानसिक आणि आध्यात्मिक विकासासाठी विविध विषयांवर मार्गदर्शन करण्यात आले. यामध्ये सकाळी उठल्यापासून ते रात्री झोपेपर्यंत म्हणावयाचे श्लोक, आरोग्यासाठी विविध व्यायाम प्रकार, भारतातील थोर राष्ट्रीय पुरुष व संत यांचा दैदीप्यमान इतिहास, मंदिर आणि त्याचे महत्त्व, मंदिरात देवतांचे दर्शन घेण्याची योग्य पद्धत, मोठ्यांचा आदर कसा करावा, तसेच नमस्कार करण्याची शास्त्रोक्त पद्धत, यासारख्या अनेक महत्त्वाच्या गोष्टी प्रात्यक्षिकांसह शिकवण्यात आल्या. शिबिराच्या अंतिम दिवशी समारोप कार्यक्रम आणि बक्षीस वितरण सोहळा पार पडला. यावेळी उपस्थित पालकांशी संवाद साधण्यात आला. सहभागी बालकांनीही अनुभव सांगून अशा शिबिरांची अत्यंत गरज असल्याचे मत व्यक्त केले. बालकांचा, पालकांचा सहभाग : या पाच दिवसीय शिबिराला विद्यार्थ्यांची लाभलेली उपस्थिती उल्लेखनीय होती. जानोरकर मंगल कार्यालयातील शिबिरात ८० हून अधिक तर राजेश्वर कॉन्व्हेंटमधील शिबिरात १५० हून अधिक बालकांनी सहभाग नोंदवला. सनातन संस्कृतीची ओळख, सणांची माहिती व संस्कार मुलांवर नियमित व्हावे म्हणून सनातन संस्थेच्या वतीने सर्वांसाठी खुले व विनामूल्य साप्ताहिक संस्कार वर्ग जुने शहर परिसरात सुरू आहेत. ज्यांना शक्य होईल त्यांनी आपल्या पाल्यांना खालील वर्गात पाठवू शकता, असे कळवण्यात आले आहे. शिबिरामध्ये केवळ धार्मिकच नव्हे, तर मुलांच्या मनावर नैतिक मूल्ये रुजवण्यासाठी बोधकथा सांगण्यात आल्या. तसेच कपाळावर टिळा लावण्याचे वैज्ञानिक व आध्यात्मिक महत्त्व, आध्यात्मिक दृष्टीने केक न कापता भारतीय पद्धतीने वाढदिवस कसा साजरा करावा, ऋषीमुनींनी लावलेले शोध आणि देवांशी आत्मनिवेदन कसे करावे (संवाद कसा साधावा) याविषयी अत्यंत सोप्या भाषेत मार्गदर्शन करण्यात आले. याशिवाय मुलांच्या कलागुणांना वाव देण्यासाठी चित्रकला स्पर्धा आणि विविध आध्यात्मिक खेळही घेण्यात आले. विद्यार्थ्यांना अभ्यास कसा करावा आणि अभ्यासाच्या माध्यमातून स्वतःचे गुणसंवर्धन कसे करावे, याचेही विशेष तंत्र या शिबिरात शिकवण्यात आले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
