संत गाडगे बाबा अमरावती विद्यापीठाच्या उन्हाळी सत्रातील काही अभ्यासक्रमांच्या पुनर्परीक्षा १४ मे रोजी होणार आहेत. विद्यार्थ्यांकडून प्राप्त झालेल्या तक्रारींनंतर विद्यापीठाच्या प्राधिकारिणीने हा निर्णय घेतला आहे. परीक्षा व मूल्यमापन विभागाकडून मिळालेल्या माहितीनुसार, या परीक्षा गुरुवारी, १४ मे रोजी आयोजित करण्यात आल्या आहेत. काही अभ्यासक्रमांच्या परीक्षांबाबत विद्यार्थ्यांना तक्रारी होत्या, ज्याची दखल घेऊन विद्यापीठाने पुनर्परीक्षा घेण्याचा निर्णय घेतला. ज्या अभ्यासक्रमांच्या पुनर्परीक्षा होणार आहेत, त्यात एम.ए. जर्नालिझम अँड मास कम्युनिकेशन सेमीस्टर – ४ (एनईपी) मधील ‘इंटरकल्चरल कम्युनिकेशन’ हा विषय समाविष्ट आहे. तसेच, बॅचलर ऑफ इंजिनिअरिंग (कॉम्प्युटर सायन्स अॅन्ड इंजिनिअरिंग) सेमीस्टर – ६ (सी.बी.सी.एस.) मधील ‘बीग डाटा अॅनॅलिटिक्स’ आणि ‘आर्टिफिशियल इंटेलिजन्स अॅन्ड डाटा सायन्स’ या विषयांचाही समावेश आहे. सेमीस्टर – ८ मधील ‘कॉगनिटिव्ह टेक्नॉलॉजी’ या अभ्यासक्रमाचीही पुनर्परीक्षा घेतली जाईल. या पुनर्परीक्षा १४ मे रोजी दुपारी २ ते ५ या वेळेत होतील. या संदर्भात सर्व संबंधित महाविद्यालयांचे प्राचार्य, केंद्राधिकारी आणि परीक्षा केंद्रांना कळविण्यात आले आहे. महाविद्यालयांनी विद्यार्थ्यांना या बदलाची तातडीने माहिती द्यावी, असे आवाहन परीक्षा व मूल्यमापन मंडळाचे संचालक डॉ. नितीन कोळी यांनी केले आहे. अधिक माहितीसाठी, विद्यार्थी विद्यापीठाच्या संकेतस्थळावरील परीक्षा विभागाच्या अधिकाऱ्यांच्या क्रमांकावर संपर्क साधू शकतात, असे विद्यापीठाने कळवले आहे.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
