कराड तालुक्यातील पेरले गावाजवळ पैशाच्या व्यवहारातून एका तरुणावर पिस्तुलातून गोळीबार करून गंभीर जखमी केल्यानंतर अहिल्यानगर येथे फरार झालेल्या दोन्ही आरोपींना स्थानिक गुन्हे शाखा व उंब्रज पोलिसांच्या संयुक्त पथकाने अवघ्या 24 तासांत अटक केली. 17 जुलै रोजी रात्री सुमारे 11.45 वाजता इंदोली पुलाजवळील पाणंद रस्त्यावर ही घटना घडली. संतोष शंकर घोलप (वय 37, रा. कालगाव, ता. कराड) यांना पैशाचा व्यवहार मिटविण्याच्या बहाण्याने बोलावण्यात आले. त्यावेळी आरोपी सोमनाथ रमेश चव्हाण (रा. कालगाव) व त्याचा साथीदार योगेश सुदाम दीक्षित (रा. मसूर, ता. कराड) यांनी फिर्यादीला शिवीगाळ व धमकी दिली. त्यानंतर सोमनाथ चव्हाण याने फॉर्च्युनरमधून पिस्तूल काढून दोन गोळ्या झाडल्या. त्या चुकविण्याचा प्रयत्न करत असताना घोलप यांच्या दोन्ही पायांना गोळ्या लागून ते गंभीर जखमी झाले. या प्रकरणी उंब्रज पोलिस ठाण्यात भारतीय न्याय संहितेतील विविध कलमे, शस्त्र अधिनियम व महाराष्ट्र पोलीस अधिनियमांतर्गत गुन्हा दाखल करण्यात आला. घटनेचे गांभीर्य लक्षात घेऊन पोलीस अधीक्षक निखिल पिंगळे व अपर पोलीस अधीक्षक डॉ. वैशाली कडुकर यांनी आरोपींना तातडीने अटक करण्याचे आदेश दिले. स्थानिक गुन्हे शाखेचे पोलीस निरीक्षक विश्वजीत घोडके यांच्या नेतृत्वाखाली पोलीस उपनिरीक्षक चंद्रकांत पुजारी यांच्यासह विशेष तपास पथक तयार करण्यात आले. तांत्रिक विश्लेषण, गोपनीय माहिती आणि साक्षीदारांच्या मदतीने आरोपी अहिल्यानगर येथे लपल्याची माहिती मिळाली. त्यानुसार पथकाने कायनेटीक चौकातील साई सुर्या हॉटेलवर छापा टाकून दोन्ही आरोपींना ताब्यात घेतले. त्यानंतर पुढील तपासासाठी त्यांना उंब्रज पोलिसांच्या स्वाधीन करण्यात आले.
Doonited Affiliated: Syndicate News Hunt
This report has been published as part of an auto-generated syndicated wire feed. Except for the headline, the content has not been modified or edited by Doonited.
